Moob Muaj Txujci/Hmong’s Got Talent
Txoojcai Kev Sibtw.
Peb Lub Zeem Muag: Qheb kev sibtw tsua Moob txhualeej tuaj nthuav tawm txug puab tej txujci los tsaab peevxwm tsua suavdlawg tau paub, tau pum hab tau kawm.
Muaj Feem Sibluag: Mej txhua leej txhua tug yuav muaj feem sibtxwg sibluag xaa mej tej txujci tuaj sibtw. Peb yuav tsis siv mej tej txujci moog ua lwm yaam, tsuas siv coj moog tso tsua txuj kev sibtw xwb. Peb tsis txav txim tas koj zaaj zoo los tsis zoo. Kev txav txim yog qhov muaj tuabneeg saib los caum koj zaaj coob los tsaw-–coob hab tsawg yog tshwm tawm los meejtseeb lug ntawm peb tshooj ytube “Hmong’s Got Talent.”
Cov Tuaj Sibtw: Txhua tug kws xaa nwg teg txujci tuaj sibtw paub meej tas tsis muaj leejtwg yuam los txhob nwg ua nwg teg dlejnum, taabsi yog nwg tugkheej txaus sab hlo ua hab xaa nwg zaaj tuaj. Nwg to taub tas nubtwg nwg zaaj txujci nkaag tau Hmong’s Got Talent tshooj ytube lawm, ces nub ntawm nwg zaaj yuav yog peb le lawm. Nwg nkaag sab tas nwg yuav tsis ntshav teebmeem/tsim kev kub ntxhuv tsua peb, hab nwg yuav tso peb dlim teg dlim taw yog tas nwg teg txujci muaj kev cuam xyuam txhum cai tsua lwm leej lwm tug (xws le copy right violations). Tshaaj qhov ntawm, koj tug tuaj sibtw to taub meej ntxwv tas “Hmong’s Got Talent” yuav tsis laav paub ib yaam teebmeem dlaabtsi kws tshwm swm tsua koj, tsis hais lubcaij koj taab tom npaaj koj zaaj, tub muab koj zaaj xaav tuaj lawm, los sws tom qaab tub muaj kev sibtw lawm. Koj leeg yuav tsis lam peb tas vim peb muaj kev sibtw es koj txhaj muaj teebmeem rwg koj taub hau.
Koj tseem to taub ntxwv tas “Hmong’s Got Talent” muaj cai npuv npo txwv tsis pub tso koj zaaj, yog tas nwg yog ib yaam kws yuav tsis tsaug ntsej tsaug muag tsua suavdlawg tuaj saib tuaj pum.
Round of Show: Hmong’s Got Talent yog tug txav txim sab seb lubcaij twg peb muaj qheb, muaj kaw, hab tshaaj tawm tas leejtwg yog tug muaj yeej lug ntawm txuj kev sibtw. Kev sibtw, thaum peb txug thaum xaus, ib zag twg yuav siv le 90 nub los tseem ntev tshaaj ntawm. Peb muaj cai yuav ncua noob nyoog ntxwv los txav kuam lub noob nyoog tuablu, yog tas cov tso npe tuaj sibtw tsis muaj txawm peem, los muaj tshaaj qhov peb tau teev tseg.
Tug Muaj Yeej: Leejtwg yog tug muaj yeej, tug ntawm yuav tau txais khoom plig lug ntawm Hmong’s Got Talent tsaws le peb kev cog lug tseg (ntau hab tsawg nyob ntawm peb kev txav txim sab—khoom plig yog dlaabtsis hab npaum twg, peb yeej yuav muab tshaaj tawm thaum lubcaij peb yuav qheb muaj kev sibtw). Cov nyaj los khoom plig yuav muab xaa ncaaj ntsaim tsua tug muaj yeej, tsaws le nwg qha peb.
Txujci Dlaabtsi Peb Txhaj Txais: Txhua txhua zag kws peb qheb muaj kev sibtw, peb muaj plov meej txug tej yaam peb xaav tau los xaav kuam tshwm swm. Yog tsis muaj kev txwv los cuab coos, ces txhais tau tas peb yuav txais txhua yaam txujci, tsis hais ntau tujlub, tuavcug, ua zaub mov noj los lwm yaam ……yaam twg los yeej tau tsuav yog nwg zaaj muaj ib feem cuam has txug Moob teejtug xwb.
Tshooj channel nuav yog txhob txwm tsaa lug txhawb nqaa Moob tej txujci los tsaab peevxwm. Vim le ntawm, yog koj yog tug Moob yug, koj yuav siv pej kum lug coj lug txhawv koj teg txujci tawm tuaj los peb yeej txais. Taabsi yog leejtwg yog pejkum neeg, xaav tuaj koom peb kev sibtw, tug ntawm yuav tsum tau siv Moob lug los tej yaam kws yog Moob teejtug cov lug txhawv nwg teg txujci peb txhaj txais yuav.
Lug Ceebtoom: Ua ntej koj yuav xaa los tso koj teg txujci tuaj tsua “Hmong’s Got Talent”, koj leeg paub tas koj tub tau nyeem los nov txug peb txooj cai kev sibtw lawm. Txooj cai sibtw kuj yuav muaj hloov moog hloov lug, txug qhov tsis tau qha leejtwg; yuav tau ua le ntawm peb teg dlejnum txhaj dlha tau zoo, tsis muaj dlaabtsi khuam teg. Koj tug tuaj sibtw cog lug tas koj yeej to taub, txaus sab, yuav le peb has, hab tsis kib nyom peb txooj cai kev sibtw.
​